Carl-Louis-Space_0036 photo by Olav Stubberud (1080x720)

EDM-artisten, som på grunn av ei ulukke måtte melda avbod til fjorårets Ranglerock, er igjen klar for å pirra danseføtene til Bryne-publikummet med sitt bevegande lydlandskap. Carl Louis gjekk for ei tid tilbake ut av den suksessrike EDM-duoen CLMD for å forfølgja sitt eige ønske om å framføra eigenkomponert elektronisk musikk live. Musikk som han sjølv har uttala skal reflektera kven han er som person.

Her er det snakk om forholdsvis roleg, men taktfull, seig og ekstremt dansbar elektronika, med eit spanande og ukonvensjonelt uttrykk i grenselandet mellom undergrunnen og det kommersielle. Debutalbumet, Telescope, blei lansert av Warner Music hausten 2015. Kor han på nokre av låtane fekk vokalhjelp av både Pav, som er kjent frå det tidlegare Ranglerock-gjestande bandet Eye Emma Jedi, og Ary, som opptredde under fjorårets Ranglerock. I desse dagar er han i ferd med å gje ut sitt andre album, Memory Lane, låt for låt. Allereie til gode kritikkar og listing i NRK.